MAANKAAB.COM - Hoyga Arrimaha Bulshada

Madaxweynaha oo Cafis u Fidiyey Maxaabiista Jeelka Boorama ee aan u Xidhnayn Xaq Dad Kale ku Leeyihiin

Wasiirka Madaxtooyada oo ka hadlay sababta keentay maxaabiista badan ee ku jira jeelasha + ujeedada loogu talogalay dhismaha xabsiyada

Hargeysa (MK)- Wasiirka Madaxtooyada Jamhuuriyadda Somaliland Md. Maxamuud Xaashi Cabdi, ayaa sheegay in Madaxweyne Axmed Siilaanyo uu cafis u fidiyey maxaabiista ku jira jeelka dhexe ee magaalada Boorama, marka laga reebo kuwa u xidhan xaq dad bani’aadan ah ku leeyihiin.

 “Madaxweynaha Qaranka markii warbixintaasi soo gaadhay wuxuu go’aansaday in xabsigan sidii xabsiga Burco oo kale uu sameeyey inuu cafiyo dhammaan wixii maxaabiis ah ee aan u xidhnayey xaq bani’aadam, madaxweynaha qaranku xaq uma laha oo ma cafiyi karro wixii xaq bani’adam u xidhan, haddii uu cid dilay, iyo haddii uu cid dhacay-ba, wixii dunuub fudud qaranka ka galay ayuu go’aansaday inuu cafiyo, beri ilaa saa’dambe ayaa la sii dayn doonaa, sidoo kale dhismihii Jeelka cusubina waa socdaa,” ayuu yidhi Wasiirka Madaxtooyadu.

Waxa kaloo uu ka hadlay safarka ay ku tageen magaalada Boorama ee Gobolka Awdal, waxaannu yidhi; “Socdaalka aannu gobolka Awdal ku nimid marka laga yimaado kormeerka cisbitaalka guud iyo xaalada shuban-biyaadka, waxa ka mid ahaa in aannu u kuur-galno xaaladda xabsiga dhaexe ee gobolka Awdal magaalo madaxdiisa Boorama in aanu eegno, oo war bixin laga soo gaadhsiiyey madaxweynaha qaranka, oo taliyaha ciidanka Asluubtu uu u keenay oo ah in maxaabiistii ku badatay, guud ahaana jeelasha aynu haysnaa waa kuwo la dhisay xiligii Ingiriiska intii xukuumadda xisbiga KULMIYE tallada haysayna waxaannu dhisnay Jeelashii ugu badnaa, marka laga yimaao kuwaa ay dawladda Ingiiirsku dhistay, qaarna waanu ballaadhinay.”

Waxaannu intaas ku daray; “Magaallada Boorama waxaannu gacanta ku haynaa xabsi cusub oo weyn oo beddeli doona kan, waayo xabsiyada waxa loo sameeyaa in dadka dambiyada lagaga gooyo, lagu dhaqan celiyo, laguna xannaaneeyo, in lagu laayo oo ay ku dhintaan dawladuhu uguma tallo galaan.”

Wasiir Maxamuud Xaashi Cabdi, ayaa sheegay in tirada maxaabiista korodhay ee dalku ay tilmaan u tahay in danbiyada ka dhacay dalku badanayaan, waxaannu yidhi;  “Xabsigan iyo kuwa kale ee dalkaba waxa ku soo kordhay maxaabiis badan, waayo dunnuubtii ayaa kordhaysa, waana meesha loogu tallo-galay in dadka dambiyada lagaga reebo oo dhaqan-celin loogu sameeyo, markaa xabsigan tiro badan ilaa 190 qof ah ayaa ku xidhan, shan ka mid ah waxa ku dhacay xannuunkii shuban biyoodka, cusbitaalka ayaa la geeyey, may dhiman Alle mahaddii si fiican ayey u soo kabanayaan,” ayuu yidhi Wasiir Maxamuud Xaashi Cabdi.

Xafiiska Maankaab

maankaab1@gmail.com


Share This:

Ka Dhiibo Fekerkaaga

xulashada