MAANKAAB.COM - Hoyga Arrimaha Bulshada

Heesta Rubuc-guurada ama 25-Guurada 18ka Meey

Heesta Rubuc-guurada ama 25-Guurada 18ka Meey

Ereyadii: Boobe Yuusuf Ducaale

Calanyahow genkaagiyo,

Boqol-guuradaadii,

Rubuc baa guntamayoo,

Gallad Eebbe weeyee,

Guryo-samo barwaaqiyo,

Guclo-orodkii dheeraa,

Libin waxaan ku goostiyo,

Guunyiyo dad waa negi,

 

Kooras

 

Guullaa abaalka leh,

Da’-yartii gadooddiyo,

Gadh-caddaa dagaallamay,

Haweenkeenni geylamay,

Guryo-noqod la mahadshaa,

Geyi nabad ah lagu dagay,

 

Calanyahow  gu’gii hore,

Gogol lagu heshiiyiyo,

Gacan-qaadkii loo bogay,

Waa ti geedka loo bilay,

La-guddoomay nabaddee,

Salka guusha loo dhigay,

Dhagartiyo qudh-goyntii,

Magta geela loo huray,

 

Kooras

 

Calanyahow gu’gii xigay,

Burco goonyaheedii,

Gadh-wadeenku waa kii,

Intuu geesi kaashaday,

Ka-gadaalna taladii,

Gun-dhiggii ku soo jaray,

Gooni loo is-taagiyo,

Dawladnimada gaarka ah,

 

Kooras

 

Calanyahow gu’gii xigay,

Galbiskeedi Boorame,

Kala-guur la mahadshiyo,

Xilkoo Guurti qaaddiyo,

Guddoon fiican baa dhacay,

Axdiyo is-gargaariyo,

Gadh-wadeen la doortaa,

Lagu soo gunaanaday,

 

Kooras

 

Calanyahow gu’gii xigay,

Guutooyin ciidan ah,

Taangiga gurguurtiyo,

Qoryihii la soo guray,

Meel lagu gunneeyiyo,

Waa tii gaadhka loo diray,

Xeryo lagu gabbaanaday,

Gaasas qaranna laga dhigay.

 

Kooras

 

Calanyahow gu’gii xigay,

Gorfayntii Dastuurkoo,

Afti lagu garwaaqsaday,

Xisbiyadii la gaafaa,

Doorashooyin galayoo,

Maso loo gudboonyiyo,

Xalaal godob-la’aaneed,

Guryo nabad ah lagu keen,

 

Kooras

 

Calanyahow gedaafiyo,

Ku-gabbood-falkaagii,

Kama gaabsan shicibkuye,

Waa kuwii ka giirtee,

Nafta geedka ugu xidhay,

Adna gudo abaalkoo ,

Celi wixii laguu galay,

Gef adduun ma waayee,

 

Kooras

 

Calanyahow gumaadkiyo,

Dhiigga gobo’ leh lagu helay,

Ha hilmaamin godobtiyo,

Wixii hawl laguu galay,

Si’ gadaal wixii dhaca,

Dadku uga gadoodaan,

Libintaada gaarka ah,

Guudka kaaga dhowraan,

 

Kooras

 

Ma gunaanadkaygiyo,

Ictiraafka gaasiran,

Gole- joojintiisaa?

Gudaha oo la hawl-galo,

La guddoomo wada-hadal,

Dalka goonyihiisoo,

Xukunkeenu gaadhiyo,

Saami-qaybsi gobannimo,

 

Kooras

 

Dhammaad

 

 


Share This:

Ka Dhiibo Fekerkaaga

xulashada